Ang Buhay ni St. John Marie Vianney

Sa pagkakabasa ko ng talambuhay ni St. John Marie Vianney, ang patron ng mga pari, ay napamangha ako sa kanyang kababaang-loob, kanyang pagiging bukas-palad, at kanyang matinding debosyon sa Diyos. Napamangha rin ako sa kanyang pagpupursigi at pagsisikap sa pagiging isang pari at sa iba pa niyang nagawa at naiambag sa komunidad sa kanyang kapanahunan.

Si St. John Marie Vianney ay ipinanganak sa Pardilly, Lyons, France noong ika-8 ng Mayo 1786. sa pagpasok niya sa seminaryo ay talagang di kakwestiyon-kwestiyon ang kanyang debosyon ngunit isa sa mga balakid ay ang kanyang limitadong kaalaman. Dahil [dito] sa hamong ito, ay muntik na siyang hindi maordinahan bilang isang pari sa kanyang kahirapang pag-aralan ang wikang Latin na siyang pangunahing wikang ginagamit ng mga pari nang mga panahong iyon. Kamangha-mangha ang kanyang mithi sa kabila ng mga balakid na tulad ng mga nabanggit.

Nang si St. John Marie Vianney ay naordinahan na bilang isang pari at natalagang magsilbi sa bayan ng Ars, dito ako higit na namangha at nadala. Sa mag panahong ito ay marami siyang na-convert na mga tao sa paniniwala sa Diyos at ang kanyang pampalipas-oras ay ang makinig ng kumpisal sa loob ng 11-16 oras sa isang araw. Ngunit ang mas nakakabilib ay ang kanyang abilidad na makita ang nakaraan at kinabukasan ng kanyang mga penitente. Sa mga nabanggit na ito, tunay ngang isa siya sa mga tinawag ng Diyos at ang kanyang matinding debosyon sa Poong Maykapal ay di sukat; ang kanyang pananampalataya at paniniwala ay napakalaki; at ang pag-ibig niya para sa Diyos ay napakalawak. Dahil dito'y isinagawa niya at isinabuhay ang Pulong ng Diyos at ibinahagi niya sa iba ang mensahe ng kasulatan ng Poong Maykapal.

Tunay ngang tagapanglingkod si St. John Marie Vianney ng Diyos - tapat na sundalo at tagapaglingkod ng Poong Maykapal. Kaharap man ang kasamaan at ang pinuno ng mga ito, ang demonyo, at ilang mga galamay nito sa mundo, ay di siya nagpadaig at nagpalupig. Napagtanto kong lubos na ang kabutihan ay laging nangingibabaw kaysa kasamaan at mayroon tayong kanya-kanyang pamamaraan upang makatulong sa ating kapwa at ipalaganap ang salita ng Diyos. Higit pa rito, sa mga himalang kanyang naisagawa ay nakita kong lubos ang kabutihan ng Diyos at ang walang sukat niyang pagmamahal sa atin. Sa pamamagitan ni St. John Marie Vianney, ay ipinakita ng Diyos ang kanyang walang katapusang pag-ibig at pagkalinga sa ating kanyang mga anak. Nakita ko na lahat tayo'y may kahalagahan at puwang sito sa mundo at sa susunod.